På Tøyen bur Ronja, Melissa og faren. Far er alkoholikar. Melissa er seksten og må ta ansvar. Ho har gjennomskoda faren, mens Ronja er liten og framleis vågar tru på draumane hans. For mellom fyllekulene er det ein snill og omsorgsfull far der. Det er bare det at han ikkje greier å halde på ein einaste jobb. Ofte er det tomt kjøleskap. Det gjeld å ete mykje når faren har litt pengar og bruker dei på mat for neste dag kan det vere tomt.
Ronja møter vaktmeisteren i porten. Ho gir maten sin til ekornet og vaktmeisteren deler maten sin med Ronja. Vaktmeisteren er ein av dei magiske i livet. Ein som ser og forstår. Ein som tar ned plakaten om behov for juletreselgar og ber henne ta den med til faren.
- Undere kan skje, pleide vaktmesteren å si. - Noen ganger finnes det bare ingen annen utvei, og da skjer et under.
 |
| S. Dali |
Dette er den moderne varianten av Piken med svovelstikkene av H.C. Andersen. Og det er mykje ein kan kjenne igjen frå Astrid Lindgren. Brødrene Løvehjerte. Mio min Mio osb.
Det er ei fortelling om å leve med alkoholisme i familien. Om livsløgn og flukt frå det verkelege livet. Det er ei fortelling om håp. Det er ei fortelling om at det finst folk der ute.
Det er ei trist fortelling og det er ei nydeleg fortelling. Det er ei fortelling full av hard realisme og magiske augeblink. Denne fortellinga kan fort bli ein del av julelebøkene mine.
Eg tilrår.
Og eg tilrår Litteraturhuset i Oslo sin podkast der Alf Kjetil Walgermo og Ingvild Rishøi har ein interessant samtale om boka.
---
Forfattar: Ingvild H. Rishøi
Utgitt år: 2021
Forlag: Gyldendal